Mat 1 | AOJFILIFITA | STEP | Wambota anama bafapana akupana Jisas Kraisi amama. Jisas nataga wambota Deviti, Devit nataga wambota anama Abrahami.

Matthew 1

Agofa epes hiesi bafapana Jisasi

(Lu 3:23-28)

1 Wambota anama bafapana akupana Jisas Kraisi amama. Jisas nataga wambota Deviti, Devit nataga wambota anama Abrahami. 2 Bafasas ehasas wambota atama Abrahami isima. Nogalomana Abrahami Aisak. Nogalomana Aisaki Jekop. EaꞋ Jekop ahalomana Judai naloma sahopana owalopana ananimi. 3 Juda ahalomana Peres naloma Sira. MamaꞋwam amamuꞋwi Tamar. EaꞋ Peres ahalomana Hesron, eaꞋ Hesron ahalomana Ram. 4 Ram nogalomana agilinama Aminadap. EaꞋ nogalomana Aminadap Nason. EaꞋ nogalomana Nasoni Salmon. 5 EaꞋ Salmon nogalomana agilinama Boas. Boas mamaꞋwana Rahap. Boas nogalomana agilinama Obet. Obet mamaꞋwana Rut, eaꞋ Obet nogalomana agilinama Jesi. 6 EaꞋ Jesi anan ahalomana dembinai king Devit.

Devit nasoꞋ anoꞋw nemataꞋw fowaꞋ Uria naseꞋakwi nola king Solomon. 7 EaꞋ Solomon nogalomana agilinama Rehoboam, eaꞋ Rehoboam nola Abiya. EaꞋ nogalomana Abiya agilinama Asa. 8 Asa anan ahalomana Jehosafat, nola Jehoram. EaꞋ Jehoram ahalomana Usia. 9 EaꞋ Usia nola Jotam, Jotam nola Ehas ahalomana Hesekia. 10 Hesekia nogalomana agilinama Manase, eaꞋ Manase nola Emon. Emon ahalomana Josaia. 11 EaꞋ Josaia nola Jekonia naloma owapana ananimi maloma ahalomam mamaꞋwam safeꞋ sandaꞋ kalabus sapani wambel Babilon laugoma.

12 Esis sofaꞋas sembaloꞋas laꞋifis sapani Babilon, Jekonia nogalomana ananinai agilinama Sealtiel, eaꞋ Sealtiel nola Serubabel. 13 Serubabel anan ahalomana Abiut eaꞋ Abiut nola Eliakim. Nogalomana ananinai agilinama Asor. 14 Asor nogalomana agilinama Sadok, eaꞋ Sadok ahalomana Akim. Akim nola Eliut. 15 EaꞋ Eliut nogalomana agilinama Elieser, eaꞋ Elieser ahalomana Matan. EaꞋ Matani nola Jekop ahalomana Josep. 16 Josep anama nasoꞋ Maria. EaꞋ Maria kola Jisas, deiꞋ esis saꞋi anan Krais Dembinai God nandandepana nasapaꞋana nafiꞋi. 17 Amam bafapana akupana Jisasi fowaꞋimi seambam mataga naꞋama. Amam amama Abraham nolam magiꞋ matagai mafiꞋi matagama Devit, amama seambam mataga 14-peleim. EaꞋ amam amama Devit nolam magiꞋ matagai mafiꞋi matagama nemaf anama naumbih safiꞋi sofaꞋ esis Israel safeꞋ sandaꞋ kalabus sape wambel Babilon, amama wapotiꞋ 14-peleim. EaꞋ amam amama esis Israel sandaꞋ kalabus Babilon solam magiꞋ matagai mafiꞋi matagama nogota Krais nataga anai, amama wapotiꞋ 14-peleim.

Maria kola Jisas

(Lu 3:23-28)

18 FowaꞋ Maria kola Jisas Krais, basef amama mape naꞋama. MamaꞋwana Maria esis saꞋi akwaꞋw koseꞋa Josep, eaꞋ esis bias ina deiꞋ sandaseꞋama, ataꞋ owaꞋetin. EaꞋ sati Maria kofaꞋ opafa Ambal BuꞋunai Godi nafiꞋmai akwaꞋw eaꞋ opafuꞋw. 19 WaulunamaꞋw akwoꞋunai Josep anan aman buꞋunai. Anan nandaiwaꞋma neandaꞋakw ambal aol. NaꞋama okom naꞋi nondambahoꞋ nokwahoꞋw kopan etin. 20 Anan nape ataꞋ okom nandandaꞋma amama atom, eaꞋ naꞋoh nandondoꞋoh, anona ensel Dembinai natagamana naꞋipana naꞋi, “Josep, ineꞋ akunamena Deviti, ina umbamehenama neaoꞋwa wauluꞋmina ineꞋikwi Maria, owaꞋ. DeiꞋ main, awani inima napeiꞋwi, Ambal BuꞋunai Godi nafiꞋmai akwaꞋw. 21 Nambimb kola awani aman, awani inima anan nigiambama amam nematawa hiesi ma neakwaha waf aonai asasinai nofaꞋas sotanimani. NaꞋama deiꞋ ineꞋ nendaꞋmanagel Jisas. Basef ofagema ma agel anama naꞋi, anan aman nofaꞋ epes ananisi ma seape andeandeꞋ.” 22 Amamaga amama hiami mataga naꞋama siꞋi anom basef Dembinai naseꞋanam malogel anona aman profet fowaꞋinai, deiꞋ mataga endilisi. FowaꞋ gani profet anama naꞋiam naꞋama naꞋi,

23 “Owagama anoꞋw nemataꞋw awiawaiꞋwi owaꞋ kweaseꞋ amani opafuꞋw. EaꞋ kola enin awani aman agel ananinai Emanuel.”
Agel anama ofagena naꞋiam naꞋama naꞋi, “God nape naloma apeꞋ.”

24 EaꞋ Josep naꞋoh nandamboma nandaꞋam siꞋi ensel naꞋipana. EaꞋ naila basef amama naoꞋwakw eaꞋ esis ina sandaseꞋama sapan etin, owaꞋ. AtaꞋ sape deindei safeꞋma akwaꞋw kola awani aman. EaꞋ nandaꞋmanagel Jisas.